Pundo alang sa Cebu City Charter Day gikibrahan

CEBU, Philippines - Dili uyon si Konsehal Margot Osmeña nga mobayad pa og emcee alang sa usa ka kalihukan nga kabahin sa pagsaulog sa ika-75 nga charter day sa dakbayan sa Sugbo.

Sa gihimong session kagahapon, ang budget sa duha ka emcee moabot ngadto sa P10 mil apan nagkanayon si Osmeña nga daghang mga trabahante sa City Hall nga dunay talento sa pag-emcee.

Parte sa maong kalihukan mao ang tigi sa balak apan gikahibulong pag-ayo sa konsehal nganong nalakip sa budget proposal ang choreographer.

Nagkanayon ang konsehal nga wala manginahanglan og choreographer ang balak.

Sa dul-an nga P10 milyones nga giduso nga budget alang sa charter day, ang konseho mi-aprobar pa lang sa P3.9 milyones samtang tun-an pa nila ang nahibilin nga kantidad kung gikinahanglan pa ba kini o dili.

Samtang si Konsehal Leah Japson kinsa maoy mipresentar sa budget proposal gisuginlan sa mga kaubanan sa konseho nga mohimo pa og dugang mga paglaslas gumikan kay dako ra kaayo ang P10 milyones.

Nagkanayon si Bise Mayor Joy Augustus Young nga maglisod siya og aprobar sa maong budget ilabi na nga init pa kaayo ang isyu karon kalabot sa budget sa siyudad.

Pasabot ni Young nga duna pa’y mga departamento ang nangreklamo sa kagamay sa ilang mga budget hinungdan nga kiwawan pa sila nga mo-aprobar sa budget proposal sa charter day.

Mipadayag usab si Mayor Michael Rama nga wala’y problema alang kaniya kung dunay mga paglaslas nga mahitabo sanglit duna siya’y gipangduol nga mga pribadong kompanya nga mahimong mo-sponsor sa nagkadaiyang kalihukan sa charter day.

Dugang pa sa mayor nga magpadayon gihapon ang naandan niya nga programa sa siyudad, ang Public-Private Partnership (PPP)   aron makadaginot ang siyudad.  - BANAT NEWS