Ex-mayor sa Aklan mi-deny nga maoy mipatay sa brodkaster

CEBU, Philippines - Gibarogan sa kanhi mayor sa lungsod sa Lezo, Kalibo, Aklan ang panghimakak sa pasangil nga siya maoy nagpusil patay sa broadcaster sa Bombo Radyo nga si Herson “ Boy” Hinolan.

Atol sa gihimong direct examination kagahapong adlawa sa sala ni RTC-Branch 16 Sylvia Paderanga sa kanhi mayor nga si Alfredo Arcenio iyang giklaro nga walay kamatuoran ang mga pasangil batok kaniya.

Matud pa ni Arcenio nga dili siya mahimong mopatay og tawo tungod kay aduna siyay giampingang pangalan ug dili usab siya mamahimong mopatay og tawo nga walay igong hinungdan.

Mipasabot si Arcenio nga isip retiradong sakop sa Armed Forces of the Philippines (AFP) ug mayor sa ilang lungsod dili niya mahimo ang susamang krimen.

Matud pa ni Arcenio nga nasakitan siya sa dihang iyang nadunggan ang mga saksi nga mitumbok kaniya nga siya gyud ang mipatay sa broadcaster.

Kahinumduman nga niadtong Nobiyembre 13, 2004 giingong gipusil patay si Hinolan ni Arcenio base usab sa ilang eyewitness nga si Niño Suñer.

Saysay pa ni Suñer sa diha nga mitestigo na kini nga iyang nakita si Arcenio pipila ka metros gikan sa lugar kun asa gipusil si Hinolan kini tungod kay diha man siya sulod sa usa ka tricycle nga nag-parking.  - BANAT NEWS