CEBU, Philippines - Duha ka anggulo ang gisubay sa kapulisan bahin sa pagpusil patay kang Michael Reyes, 29, alyas Eric Reyes niadtong Lunes sa udto samtang nagsakay kini og taxi uban sa iyang higalang si Boyet Aquino diha sa dalan Zapatera ning siyudad sa Sugbu.
Si Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) nga nahinabi sa mga tigbalita nagkanayon nga anggulo sa ginadiling drugas ug ang nahitabong drive- by shooting niadtong Sabado sa kaadlawon diin miangol sa tulo ka tawo, duha niini mga batan-ong lalaki ang ilang gisubay sa maong ambush.Matud ni Santander gikumpirmar ni Aquino ngadto kanila nga ‘nakatambling’ si Reyes og P150 mil nga kantidad sa ilegal nga drugas diha sa barangay Lorega-San Miguel.
Gawas niini, laing anggulo nga ilang gisubay karun mao ang nahitabong drive-by shooting sa managlahing lugar dinhi sa Sugbu niadtong Sabado sa kaadlawon diin duha ka 17 ug 16-anyos ug usa ka 24 anyos nga si Roque Amaya nga taga Guadalupe ug Labangon ang nangaangol. Ang mga biktima niadtong higayona nag-inom sa tindahan daplin sa karsada diha sa dalan V. Rama ug Englis sa barangay Guadalupe dihang kalit lang mihunong ang awto ug girakrakan sa sakay niini.
Ang kapulisan sa duha ka panghitabo nakakuha og impormasyon nga susama lang og deskripsyon ang gisakyan nga awto sa mamumuno nga usa ka sedan nga awto.
Matud ni Santander nga may mga saksi sa drive-by shooting mihulagway nga mihaom sa hulagway ni Reyes ang usa sa mga nangrakrak kanila. Giingong daghan kini og tattoo sa bukton nga nagsul-ob og kalo. - BANAT NEWS