Mga eskuylahan sa Mandaue nangliki

CEBU, Philippines - Upat ka tulunghaang pangpubliko ug usa ka buhatan sa kagamhanan sa dakbayan sa Mandaue ang nakabaton og liki ang mga bongbong ug sawog nga semento human sa linog niadtong Lunes sa buntag.

Si Mandaue City Administrator James Abadia nga nahinabi sa mga tigbalita miila sa mga naapektohan nga tulunghaan nga mao ang Umapad Elementary School sa barangay Umapad, Opao Elementary School sa barangay Opao, Guizo Elementary School sa barangay Guizo ug ang karaang building sa City Central School sa barangay Centro sa maong dakbayan.

Si Roger Paller, ang Public Information Officer (PIO) sa kagamhanan sa maong dakbayan sa iyang pamahayag miingon nga kun mahitabo nga dili magamit ang mga lawak saringan, maapektohan gayud ang klase sa kaliboan ka mga tinun-an nga nagtungha sa maong mga eskuylahan.

Gitataw niya nga madugangan na usab ang suliran sa kagamhanan sanglit daan na man nga adunay kakuwang sa mga lawak saringan ang dakbayan.

Matud pa ni Abadia nga namatikdan usab nga adunay pagpangliki sa pipila ka bahin sa buhatan sa accounting department nga nahimutang usab sa city hall sa maong dakbayan.

Si Abadia miingon nga nadiskobrehan kini sa mga inspector nga mi-inspeksiyon sa mga edipisyo sa mga tulunghaan ug uban pang building sa kagamhanan sa maong dakbayan. Gitataw niya nga ilang gisiguro ang pagsuta sa mga edipisyo sa mga tulunghaang publiko sanglit mao kini ang daling kabakwitan sa publiko sa higayong adunay mga katalagman sama sa sunog, baha ug uban pa nga mahitabo sa maong siyudad.

Kagahapon   sa buntag si Regional Director Recaredo Borgonia sa Department of Education (DepEd) 7 mimando sa temporaryong pagsuspenso sa klase sa mga publikong tulunghaan dinhi sa rehiyon sa paghatag og higayon sa mga structural engineer nga makasusi sa epekto sa linog niadtong Lunes ngadto sa mga edipisyo sa tulunghaang publiko sa nagkalainlaing lugar sa Central Visayas.  - BANAT NEWS