Nagpakatap sa "tsunami" gipangita

CEBU, Philippines - Giandam na sa kapulisan ang kaso batok niadtong tawo o mga tawo nga nakaingon sa pag-panic sa publiko tungod sa pagpakatap og dili maong impormasyon bahin sa tsunami human sa linog nga miigo niadtong Lunes sa buntag.

Si Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) nga nahinabi sa mga tigbalita nagkanayon nga kasong Tumults and other Disturbance of Public Order sa Article 153 sa Revised Penal Code (RPC) ang ilang giandam nga kaso batok sa maong mga tawo kun ila kining mailhan.

Gipangita karun sa kapulisan ang duha ka tawong nagsakay og motorsiklo nga nagdala ang usa niini og megaphone ug nagpahibalong nagpadulong na ang tubig sa dalan Colon.

“Naay witnesses mihatag namo og description asa iyang rota sa motor,” matud pang Santander kinsa migamit og megaphone ang maong tawo nga sa pagtuo ni Santander pribadong indibidwal lang ug base sa ilang impormasyon gikan sila sa barangay Quiot, Pardo.

Ila usab ipatawag ang mga pulis nga nadestino diha sa Colon Area human nakadawat sila og impormasyon gikan sa publiko nga midagan og apil ang mga pulis dihang nikatap na ang maong impormasyon.

“Nabutang ka diha (pulis) sa Colon area to maintain peace and order,” sumala pang Santander kinsa midugang nga ilaha pa kining i-confirm ang maong report ug patubagon kadtong mga pulis nga nadestino sa maong lugar.

Matud ni Santander ang mga pulis diha sa Colon mao untay mipasabot sa katawhan nga mokalma ug dili motuo sa sayop nga impormasyon.

Giangkon hinuon ni Santander nga dili gyud sila makabasol sa emosyon sa katawhan apan dako unta og natabang ang presensya sa pulis kung sila mipasabot dayon sa sitwasyon sanglit gibansay man unta sila og disaster preparedness.

Apan giangkon ni Santander nga nangita sila niadtong Lunes sa hapon nga kabutangan sa public address system apan kulang sila sa kahimanan hinungdan nga midangop nalang sila sa mga kabaranggayan.

Giawhag ni Santander ang katawhan nga kun duna man gani masugatan nga katalagman nga susama niadtong mikatap nga dili mao nga impormasyon kinahanglan modangop gyud sa kapulisan aron masiguro ang balita kung tinuod o dili.  - BANAT NEWS