Dasmag sa sakyanan 3 angol

CEBU, Philippines - Tulo ang angol sa dinasmagay sa tulo ka mga sakyanan didto sa highway sa barangay Inayagan siyudad sa Naga sa miaging buntag.

Ang nagkarambola nga sakyanan mao ang multicab nga gimaneho ni Federico Saballa, hingkod ang panuigon ug taga Cabantan siyudad sa Sugbo kinsa may tulo ka pasaherong naangol nga sila si Dave Saballa, 21, ulitawo, Rosalinda Saballa, 47, minyo, ug ang apo sa drayber nga si Kevin Storm Emantis ug pulos molupyo sa Cabantan.

Ang laing duha ka sakyanan mao ang Isuzu SUV nga gimaneho ni Primitivo Natad, 43, taga Inayawan siyudad sa Sugbo ug ang Isuzu Wagon nga gimaneho ni Rayail Pianut, 27, minyo taga barangay Mambaling siyudad sa Sugbo.

Si PO1 Junarie Latorre, desk officer sa Naga City Police Station mibutyag sa Banat News  nga ang multicab nagpaingon sa habagatang bahin sa lalawigan gikan sa siyudad sa Sugbo ug nagsunod niini ang SUV.

Pag-abot sa maong dapit kalit lang gidasmagan sa SUV ang multicab hinungdan nga nadaro kini ug didto mopaingon sa pikas lane sa karsada.

Apan nataymingan usab nga maoy pag-agi sa Isuzu Wagon nga gikasugat   sa multicab hinungdan sa pagdinasmagay niini. Ang tulo ka pasahero nangalabay ug mitugpa kini sa yuta nga pulos na pangos, samad ug piang ang kalawasan ug gihatod dayon sila n gadto sa South General Hospital sa Naga.

Ang drayber sa Isuzu SUV kasamtangang gitanggong sa kapolisan sa lungsod . (BANATNEWS)