6.9 nga linog sa CV pito ang patay

CEBU, Philippines - Pito ang nakalas samtang 12 ang nangaangol sa Negros Oriental samtang nagkaguliyang ang mga tawo human sa pagtay-og sa kusog nga linog tungod sa sayop nga pagsabot sa mga tawo sa gipagawas nga tsunami alert sa gobiyerno. 

Matud ni Georgio Robinson sa Philippine Institute for Volcanology and Seismology (Philvolcs) dihang nahinabi sa Banat News nabatyagan ang 6.9 magnitude nga linog nga miigo lima ka kilometro gikan sa Tayasan, Negros Oriental alas 11:49 sa buntag nga gisundan og kapin sa 20 ka mga aftershocks sa Central Visayas ug sa Mindanao.

Sa pito nga nakalas tulo pa ang nailhan gikan sa lungsod sa Tayasan, Jimalalud ug Guihulngan lakip na niini ang batang nadat-ogan og kongkretong paril, samtang 12 usab ang naangol sa Jimalalud. 

Paglabay sa pipila ka gutlo mipagawas ang Philvocs og tsunami alert level-2 sa pipila ka dapit sa Visayas ug Mindanao apan pagkaalas 2:30 sa hapon gilibkas kini. Tectonic ang origin sa maong linog nga ang sentro diha sa singko kilometros gikan sa Tayasan, Negros Oriental.   

Sa report sa National Disaster Risk Reduction and Management Council (NDRRMC) ang Dumaguete City ug Villahermoso sa Negros Oriental maoy grabeng gitay-og og intensity 7, intensity 6 sa La Carlota City, La Castellana, Negros Oriental ug Argao, Cebu.

Samtang intensity 5 sa Roxas City, Dao ug Ivisan, Capiz, Iloilo City Ayungon Negros Oriental, Kanlaon City, Lapulapu City, Guimaras, Cebu City, San Carlos City, Bacolod City, Sagay City, Tagbilaran City, Candoni, Binalbagan Negros Occidental. 

Intensity 4 usab sa San Jose de Buenavista, Pandan, Anin-y, Patnugon, Antique, Kalibo, Aklan, Sipalay, Negros Occidental, Dipolog City og Ormoc City; intensity 3 sa Butuan City, Agusan Del Norte, Legaspi City, Albay, Carmen, Cagayan de Oro, Tacloban City, Catbalogan, Saint Bernard, Southern Leyte, Masbate, Cagayan De Oro City.

Ug intensity 2 sa mga lugar sa Cabid-an, Sorsogon, Borongan, Eastern Samar, Mambajao, Camiguin samtang intensity 1 sa Pagadian City.  (BANATNEWS)