Piyansado gi-ambush patay

CEBU, Philippines - Usa ka lalaking gipasanginlang tulisan ang gipusil patay sa wala mailhing mamumuno kagahapon sa udto diha sa barangay Lorega ning siyudad sa Sugbu.

Si Michael Reyes, 29, taga San Antonio Village sa barangay Subangdako sa dakbayan sa Mandaue, nakaangkon og daghang samad pinusilan sa nagkadaiyang parte sa iyang lawas nga maoy nakaingon sa iyang hinanaling kamatayon.

Sa pasiunang imbestigasyon sa Homicide Section sa Cebu City Police Office (CCPO) nagbutyag nga gikan sa barangay Lorega ang biktima ug misakay og taxi apan pag-abot sa eskina Echavez ug Lorega St, kalit lang miabot ang duha ka wala mailhing mamumuno ug ang usa niini maoy mipaulan og bala sulod sa gisakyang taksi.

Ang kauban sa biktima nga si Bayet Aquino nakaikyas sa tino nga kamatayon. Si Reyes alyas ‘Eric Reyes’ kun kahinumduman kauban ni Edward Tevez, 28, dihang nadakpan sa kapulisan human sila gilambigit sa pagpangawat sa TV sa usa ka hotel nga ilang gipuy-an sa dalan A.S. Fortuna sa dakbayan sa Mandaue.

Apan human sila gipasakaan og kaso sa kapulisan dinhi sa dakbayan sa Sugbu pila ka semana ang nakalabay, silang duha nakagawas sa bilanggoan human nakabutang og piyansa nga P300,000 matag usa. Si Chief Inspector Bonifacio Garciano,hepe sa Investigation and Detective Management Branch (IDMB) nagkanayon nga posibling may kalambigitan sa ginadiling drugas ang pagpusil patay kang Reyes.

Ang crime scene nahimutang lang sa duha ka eskina diin pipila lang ka metros gikan sa Cebu City Police Office (CCPO). (BANATNEWS)