Driver gitulisa'g P2 mil

CEBU, Philippines - Himabaw sa P2,000 ang kinitaang salapi sa usa ka drayber sa taxi nga nasakiyo sa tulo ka wala hiilhing mga tawo nga mitulis kaniya didto sa barangay Tawason, dakbayan sa Mandaue sa miaging kaadlawon.

Ang biktima mao si Feliciano dela Pena, 36, minyo nga drayber sa Cane taxi nga nagdala sa plate number nga GXR 946, ug taga dakbayan sa Sugbo. Si PO3 Nestor Montecillo sa kapolisan sa Presinto 6 sa Mandaue City Police Office (MCPO) nga nagbase sa barangay Canduman mibutyag nga ang tulo ka mga tulisan mipara kaniya didto sa   dalan M.C. Briones sa barangay Maguikay sa dakbayan sa Mandaue.

Nagpahatod kini ngadto sa barangay Tawason sa maong dakbayan apan sa pag-abot nila sa awaaw nga lugar sa nahisgotang barangay usa sa tulo ka pasahero kalit nga   mimando sa pagpahunong sa taxi ug ang usa maoy mition og armas sa ulo sa drayber.

Dayon mideklara og tulis ang tulo busa sa kabalaka nga madisgrasya ang iyang kinabuhi wala mopakita og pagsukol ang biktima.

Diha-diha gikuha ang iyang kinitaan sa pamasahero nga mikantidad og P1,800 ug gidala usab ang iyang cell phone sa pagpanganaog niini.

Dayon namiya kini sa maong lugar nga kalma ra kaayong nanglakaw.

Samtang ang biktima mipasirit dayon sa iyang sakyanan paingon ngadto sa kapolisan aron sa pagsumbong sa nahitabo kaniya.  - BANAT NEWS