Tag-iya'g videokehan giluba

CEBU, Philippines - Mitaroy ang kutsilyo sa bukobuko sa tag-iya og videokehan human kini lubaa sa iyang customer kinsa nasuko nga napawong ang videoke samtang nagkanta kini didto sa barangay Buaya, dakbayan sa Lapulapu sa miaging gabii.

Ang biktima mao si Andres Escultor, 58, minyo nga taga Buaya, samtang ang suspetsado mao si Ramil Garbo, hingkod, nga silingan sa biktima.

Si PO2 Winston Ybanez miingon nga ganado kaayo ang suspetsado nga mikanta-kanta niadtong higayona ilabi na nga mibilib siya sa iyang tingog.

Apan mibanos ang hilabihang kapungot niini dihang nasentunawo ang iyang tingog kay   nagputol-putol man ang sound   sa videoke.

Maoy hinungdan nga gisuwayan niya og pislet-pislet ang switch niini uban sa pagpukpok sa microphone apan wa gyud maulii.

Misamot og surok ang dugo sa suspetsado dihang natiwas og kapaslok ang sound sa videoke, hinungdan nga nagpangusmo kini sa kalagot sa pagtuo nga gibinuangan siya sa tag-iya kay nasuya sa kalami sa iyang tingog.

Busa miduol ang biktima sa iyang videoke ug gipisilpisil na usab ang switch niini dihang kalit lamang gihansakan ang iyang bukobuko sa kutsilyo sa suspetsado.

Nakasiyagit ang biktima sa kasakit sa kalit nga pagtaroy sa kutsilyo sa iyang likod ug sa paglingi pa niya mikilab og dagan ang suspetsado pahilayo sa maong lugar.

Gihatod dayon ang biktima ngadto sa Lapulapu City Hospital apan gibalhin kini ngadto  sa Vicente Sotto Memorial Medical Center sa dakbayan sa Sugbo. Padayon pang gipangita sa kapolisan ang suspetsado.  - BANAT NEWS