3 naghikog

CEBU, Philippines - Usa ka tinun-an sa grade six ug laing duha ka mga lalaki ang naghikog sa managlahing mga dapit ug hinungdan.

Ang tinun-an sa grade 6 nga nag-edad og 15-anyos nagbitik sa iyang liog ngadto sa usa ka punoan sa mangga pasado alas-9 sa miaging buntag sa sitio Bitlang barangay Sudlon 1 ning dakbayan.

Usa ka Victoriana Belotindos kinsa padulong untang motubag sa tawag sa kinaiyahan diha sa maong dapit maoy nakakita sa maong batan-on nga nagbitay na sa punoan sa mangga. Daling gitawag ni Belotindos ang mga opisyal sa barangay kinsa mao nay mitawag sa kapolisan.

Sa pakighinabi sa Banat News ni PO3 Geoffrey Gutual sa Cebu City Police Office, Homicide Section, mibutyag kini nga sa ilang gihimong imbestigasyon ang menor de edad adunay sakit nga pangatol sa panit.

Matud pang Gutual gibutyag usab sa mga kabanay sa batan-on nga panglaruton niini ang buhok tungod sa kakatol niini ug dunay panahon nga molakaw kining dili mananghid.

Nagtuo si Gutual nga naguol kini sa iyang sakit maong kini naghikog.

Sa laing insidente sa paghikog, usa ka amahan nga adunay gihambing sakit ang napalgang nagbitay sulod sa ilang balay nga may hikot nga pisi sa iyang liog pasado alas-7 sa buntag kagahapon diha sa sitio Katugasan Perrelos, dakbayan sa Carcar.

Giila ang naghikog mao si Manuel Llianto kinsa sumala pa sa anak nga si Manuel Jr. iyaha pang gisuwayan sa pagluwas ug gidala sa Carcar City District Hospital apan gideklarar kining dead on arrival.

Dugang pa sa anak ni Llianto nga dugay nang nag-antos ang iyang amahan sa sakit nga nervous breakdown ug gani dili kini makatulog.

Ang ikatulong naghikog mao ang usa ka 18-anyos nga lalaki kansang patay’ng lawas nakit-ang nagbitay sa punoan sa Sambag nga dunay pisi sa liog niini kagahapon sa buntag diha sa sitio Mananga 2, barangay Tabunok, dakbayan sa Talisay.

Giila sa mga polis ang naghikog mao si Levi Rivera, residente sa maong dapit ug dunay kapuyo. Gisuwayan kini pagdala sa Talisay City District Hospital apan patay na kini.

Sa imbestigasyon nila ni SPO1 Mikie Espina ug PO2 Stephen Sefuesca gituohang grabeng selos ang hinungdan sa paghikog ni Rivera.

Si Rivera giingong kanunay nalang masuko sa iyang kapuyo nga si Josephine Dollier matag manumbalay ang naulahi sa mga silingan o ba kaha moduaw sa mga higala.

Ang mga polis naka-recover og usa ka “sealant” nga 75 ml diha sa walang bulsa ni Rivera.  - BANAT NEWS