Giya sa pagbadyet

CEBU, Philippines - Sa miagi gihisgutan nato ang kamahinungdanon sa pagbahig o pagbadyet. Unsa may gidak-on sa kita, angay gyud disiplinahon o igoon nga maplastar ang kahustohan sa gasto sa karon ug sa umaabot nga panginahanglan.

Unsa may atong kagustohan ning kinabuhia, mag-agad ra gyud sa didikasyon sa atong buot buhaton ug sa hugot nga determinasyon nga imo gyud kini mahimo uban sa lahutay nga molampos ka sa imong gitinguha.

Busa sulayi kining pipila ka mga giya nga matamdam mo, sa pamasin makahatag paglaom sa gipangandoy nga di maapiki sa sitwasyon sa mga panginahanglan, sa mga higayon nga di na gyud kabalibaran.

“Magsinabtanay mo sa husto nga pagduma sa unsa mang madawat nga kita o suweldo..*Pagdaginot kanunay ang isilsil sa kaisipan. Respitohi ang sensilyo, kay swerte kini sa abundang pundo mo..*Kuhai og 5-10% ang kita ug ang nahibilin maoy bahigon o badyeton..*Klasipikahon ang mga galastohan, aron inaton o pug-okon o bahason ang way pulos sa inadlaw nga gasto..*Aktuwal nga kwarta ray gunitan alang anang adlawa nga gasto. Likaye paggunit ang sobra sa badyet kay maapil kanag gasto anang higayona..*Ibutang sa banko o coop ang nahipos nga kwarta gikan sa sobra sa pagdaginot, ekstra nga kita sa obertym o laing pangwarta ug uban pa. Ayaw sa ATM kundi sa savings. Unya kun modako na ang nahulog, ibalhin sa time deposit aron dako’g interes. Sa Coop, ok sab kay dagko ang mga interest ini.

Paniid mo sa uban nga adunay mga maayo pang paagi sa pagbadyet. Og sa sunod, hisgutan na pod nato ang mga diskarte sa pagdaginot. (BANATNEWS)