Bag-ong merkado sa Aloguinsan gisubhan

CEBU, Philippines - Hingpit nang natapos ug gisubhan na ang P27 milyones   nga merkado publiko sa lungsod sa Aloguinsan sa miaging adlaw.

Sila si Gobernador Gwendolyn Garcia ug 3rd District Congressman Pablo John Garcia mitambong sa maong pagsubo.

Gawas sa managsuong Garcia, didto usab sila si provincial board member Caesar Ian Zambo ug Alex Binghay kinsa mga sakop sa hunta sa ikatulong distrito sa lalawigan.

Si Aloguinsan Mayor Augustus Caesar "Chonse" Moreno mipadangat sa iyang kinasingkasing nga pasalamat ngadto sa gobernador ug ni Kongresista PJ, ug sa mga sakop sa hunta probinsyal nga si Zambo ug Binghay gumikan sa daku nilang natampo sa pagpabarug sa maong modernong merkado publiko sa lungsod.

Si Congressman PJ Garcia midayeg sa bag-ong kalambuan sa lungsod sa Aloguinsan ug miisip sa maong proyekto nga dakung garbo sa ilang lungsod.

Gipasalig usab sa maong kongresista nga hingpit nang mahuman niining tuiga ang pagsemento sa dalan gikan sa lungsod sa Aloguinsan paingon sa lungsod sa Barili aron mapalambo pa ang turismo sa maong lungsod.

Miingon siya nga mao kini ang nakahatag og dakong umento sa maong lungsod itandi niadtong mga panahon sa wala pa kini hisuroyi og mga turista.

Samtang si Governor Garcia sa iyang bahin, nagkanayon nga   siya maoy labing nakasaksi sa kausaban sa Aloguinsan diin usa sa mga kabag-ohan niini mao ang   gi-inugorahan nga bag-ong "landmark"   nga mao ang modernong merkado publiko sa maong dapit.  (BANATNEWS)