Administrador sa MCC papha
CEBU, Philippines - Ang kagamhanan sa dakbayan sa Mandaue mangita na og bag-ong administrador sa Mandaue City College (MCC) hulip kang Dr. Susana Cabahug, ang nagdumala sa maong kolehiyo kansang buhatan nahimutang sa Mandaue City Sports and Cultural Complex sa sitio Tribunal, barangay Centro, sa maong dakbayan.
Kini human isalindot sa Civil Service Commission (CSC)7 ang motion for reconsideration nga gisang-at sa mga abogado ni Mayor Jonas Cortes nga naghangyo nga magpabilin si Dr. Cabahug sa iyang katungdanan.
Si Regional Director Judith Chicano sa CSC7 nagkanayon nga mahimo pang makaapelar si Dr. Cabahug ngadto sa labaw nilang buhatan sa kaulohan sulod sa 15 ka adlaw sukad luwati niini ang mando sa pagtangtang sa naulahi gikan sa iyang katungdanan niadtong Enero 17, 2012.
Nasayran nga niadtong Nobiyembre sa miaging tuig gipakanaug na sa CSC7 ang hukom nga di balido ang paghupot ni Cabahug sa iyang katungdanan.
Gumikan niini gimandoan sa CSC7 si Cabahug sa pagbiya sa iyang katungdanan.
Si Mandaue City Legal Officer Giovani Tianero miingon nga si Cabahug gitudlo ni Mayor Cortes isip security officer II ubos sa co-terminos status.
Dugang pa niya nga sa wala pa ang administrasyon ni Mayor Cortes daan na nga nagserbisyo si Cabahug sa MCC isip consultant hangtod nga gitudlo kini sa mayor isip officer-in-charge sa maong tulunghaan sa dakbayan. (WC) (BANATNEWS)
- Latest
- Trending
