Nadasmagan sa V-hire kritikal

CEBU, Philippines - Kritikal ang kahimtang sa usa ka 17 anyos nga bayong -bayong human madasmagi og V-hire samtang nagsakay sa iyang biseklita didto sa national highway sa barangay Don Gregorio Antigua lungsod sa Borbon niadtong Biyernes sa alas 3:40 sa hapon.

Ang biktima mao si Joven Verzaga, 17, ulitawo ug nagpuyo sa maong dapit.

Samtang ang nakadasmag   kaniyang V-hire gimaneho ni Edmundo Duray Pino, 42 , minyo, nga taga dakbayan sa Lapulapu, apan temporaryong nagpuyo sa lungsod sa Daanbantayan.

Si SPO1 Edgar Novabos, traffic investigator sa Borbon Police Station mibutyag sa Banat News nga ang biktima nagsakay sa iyang biseklita nga nasundan   sa V-Hire paingon sa samang direksyon ngadto sa lungsod sa Daanbantayan dihang mikalit kini og liko sa usa ka eskina sa maong lugar.

Gumikan sa kakalit wala makabantay ang drayber sa V-hire busa nakapreno kini apan ulahi na kaayo hinungdan nga nadasmagan gyud ang biktima ug nadaro sa karsada.

Apan imbis tabangon ang biktima, mipasirit hinuon ang suspetsado sa pagpadagan sa iyang sakyanan hinungdan nga gigukod kini ni Bryan Magdadaro, silingan sa biktima nga nagsakay sa iyang motorsiklo.

Didto na motahan ang suspetsado sa kapolisan sa lungsod sa Tabogon.          

Ang biktima dali nga gihatud ngadto sa Juan Dosado Memorial Hospital sa lungsod sa Sogod apan tungod sa delikadong kahimtang niini gi-transfer dayon kini sa Vicente Sotto Memorial Medical Center sa dakbayan sa Sugbo.

Samtang ang drayber sa V-hire nagtingkagol na karon sa karsel ug nagpaabot sa tukmang sumbong nga ipasaka batok niya. (BANATNEWS)