Naghuramentado tiklo

CEBU, Philippines - Usa ka mag-uumang hubog sa gidiling drugas naghuramentado ug nasakmitan sa kapolisan og mikabat sa dul-an upat ka kilo nga pinaugang dahon sa marijuana nga gibana -banang mokantidad og P30 mil uban sa iyang   pugakhang didto sa barangay Suhoton, lungsod sa Badian niadtong Biyernes sa alas 8:40 sa gabii.

Ang nadakpan mao si Mario Vertucio Secreno, 47, minyo, mag-uuma nga nagpuyo sa maong dapit.

Si SPO1 Jeremias Elardo, desk officer sa Badian Police Station mibutyag sa Banat News nga si Maria Sereno, hingkod ug asawa sa suspetsado, kauban ni kapitan   Jaime Javil sa barangay Suhoton miadto sa ilang buhatan kay mihangyo nga ipabadlong ang suspek nga naghuramentado didto sa ilang pinuy-anan.

Si PO3 Andro Canonigo ug mga kaubanan maoy miresponde niini ug naabtan nila ang suspek nga nagbitbit og shotgun sa kamot ug usa ka sako samtang nagpaninggit kini sa hilabihang kaisog ug nagpangita og kaaway.

Dihang nakabantay kini nga may mga polis, buot unta kining mo-eskapo apan na-corner siya sa mga otoridad busa diha-diha nadakpan.

Nakuha gikan kaniya ang shotgun ug ang sako nga gisudlan sa dul-an upat ka kilo nga pinaugang dahon sa marijuana.

Gibana-bana sa kapolisan nga mokantidad og P30 mil ang maong marijuana 

Gihulagway   sa kapolisan nga hubog kaayo sa marijuana ang suspetsado busa  diha-diha gibalhug dayon kini sa prisohan samtang gipaabot nga kapasakaan og tukmang sumbong gumikan sa pagpayuhot og ginadiling druga.

Sa laing bahin, nasikop usab sa mga ahente sa Philippine Drug Enforcement Agency (PDEA) ang usa ka suspetsadong drug pusher sa buy bust operation nga ilang gilusad didto sa barangay Poblacion, lungsod sa Barili sa miaging hapon.

Ang suspetsado nailhan nga si Jumabon Fuentes, 30, molupyo sa maong lugar.

Una niini nakadawat ang PDEA og impormasyon kalabot sa pagpamaligya ni Fuentes og shabu sa ilang dapit hinungdan nga dali silang mipahigayon og operasyon.

Pinaagi sa pagpakaaron ingnon nga drug user, usa sa mga sakop sa PDEA mipalit og duha ka gamay’ng pakete sa gituohang shabu gikan ni Fuentes.

Dungan sa pagtunol ni Fuentes sa shabu, gilabtikan usab dayon og posas ang iyang duha ka kamot hinungdan nga wala na kini makaikyas.

Apan gawas sa gibaligya ni Fuentes nga shabu, ang mga ahente sa PDEA nakasakmit pa og laing 15 ka putos sa gituohang shabu gikan sa lawas ni Fuentes. (WC) (BANATNEWS)