Gidakop sa tinuod nga polis

CEBU, Philippines - Nasikop sa kapolisan sa dakbayan sa Talisay kagahapon sa kaadlawon diha sa Cebu South Coastal Road (CSCR) habig sa barangay Cansojong, sa nahisgutang siyudad ang usa ka kanhi giingong sakop sa Philippine Constabulary (PC) kinsa giingong nagpapolis-polis ug nanakop sa mga motorista kinsa dunay kalapasan sa trapiko.

Ang suspetsado mao si Antonio Olvenario, 59, taga 541 barangay Poblacion, Pardo, dakbayan sa Sugbo.

Naembargo nila ni SPO1 Edgar Causon, SPO1 Benjamin Sebellita, PO2 Jason Del Campo ug PO1 Jude Enemecio gikan kang Olvenario ang usa ka kalibre .45 nga pistola nga dunay sulod nga unom ka bala, usa ka daan nga Temporary Operator’s Permit (TOP) sa Land Transportation Office (LTO), LTO agents identification card, PNP ID sling, expired nga lisensiya sa laing armas ug private security license ID card.

Si Olvenario kinsa giingong nagsul-ob og karsones nga uniporme sa PNP Trafcom ug PNP (Philippine National Police) ID sling nag-atang diha sa nahisgutang karsada ang gisita sa mga polis nga maoy misikop niya tungod kay nagtak-in kini og pusil.

Ang suspetsado wala makapakita og dokumento sa mao niyang armas ngadto sa mga polis.

Ang kapolisan nakadawat og mga report gikan sa mga motorista batok sa suspetsado kinsa giingong magpaila nga sakop sa PNP Trafcom ug deputized agent sa LTO.

Si Olvenario mag-atubang og kasong usurpation of authority ug illegal possession of firearms. Ang Dayang 125 kolor itom nga motorsiklo nga nagtangag sa plakang ZH-4621 nga giingong gigamit ni Olvenario sa iyang operasyon gi-impound usab sa kapolisan.

Si LTO director Raul Aguillus sa pakighinabi sa Banat News kagahapon nagkanayon nga ang usa ka deputized agent sa LTO dunay bag-ong ID nga dunay pirma niya pagpaila nga siya deputized agent ug dili daan nga TOP ang dalhon niini.

Si Aguillus midugang nga kinahanglang mapasakaan gyud og kaso si Olvenario sa nahimo niyang kalapasan. (BANATNEWS)