CEBU, Philippines - Duha ka mga hubog kinsa giingong nagmaoy ang nagtingkagol sa Talisay City detention cell human kini giingong nangatake ug nanukmag sa mga tanod nga miresponde og alarma didto sa barangay San Roque, dakbayan sa Talisay kagahapon sa kaadlawon.
Ang mga suspetsado mao sila si Wilson Flores, 22, ug Norberto Gani Jr., 25, parehong nagpuyo sa nahisgutang dapit.
Ang mga tanod nga naigo sa kinumo sa duha mao sila si Norberto Abarquez ug Fermin Galos Jr.
Sa imbestigasyon sa kapolisan giingong si Flores ug Gani pwerting huboga ug nagmaoy na kini.
Ang mga residente sa maong lugar nangayo og panabang sa mga tanod aron mahipos ang duha, hinungdan nga ang duha ka nahisgutang mga tanod miresponde.
Naabtan pa sa maong mga tanod ang duha nga adunay kasinukmagay nga wala hiilhing lalaki.
Si Abarquez ug Galos nagpaila sa mga suspetsado nga mga tanod sila sa barangay San Roque ug gimandoan nila ang mga hubog nga pakalmahon.
Apan imbes mokalma, si Abarquez ug Galos na hinuon ang giatubang sa duha.
Si Abarquez giingong naigo sa nawong sa kinumo ni Flores ug si Galos wala usab makalingkawas sa kinumo ni Gani.
Ang maong mga tanod nangayo og panabang sa kauban nilang mga tanod ug sa mga polis.
Laing grupo sa tanod ang miresponde sa insidente nga gilangkoban nila ni Marino Gino, Bartolome Teo, Protacio Camacho ug Nixon Labajo.
Gumikan sa tabang nila ni SPO1 Benjamin Sebellita ug PO1 Jude Enemecio ang duha ka mga hubog nasignit ug gisulod sa karsel. (BANATNEWS)