Mga vendor nga naghugaw-hugaw gidakop

CEBU, Philippines - Gisugdan na sa pagdakop sa mga sakop sa environmental enforcement team sa kagamhanan sa dakbayan sa Mandaue ang mga vendor sa merkado publiko nga nagpataka lang og labay sa ilang mga basura. Giluwatan og citation ticket ni Placido Jerusalem, hepe sa mga enforcement team ang mga dinakpan.

Si Jerusalem sa iyang pamahayag miingon nga nangayo og pasaylo ang tanan nga mga nadakpang manindahay ug misaad kining mobayad sa multa bunga sa ilang kalapasan sa ordinansa sa dakbayan.

Dugang pa ni Jerusalem nga base sa Section 1, A ubos sa Ordinance Number 10-2006 -372 kon “Ecological and Social Waste Management Ordinance” gimando niini ang pagdili sa pagpataka og labay sa mga basura ngadto sa kanal, sapa, daplin sa dalan o bakanteng luna sa maong dakbayan.

Matud pa ni Jerusalem nga pahamtangan og multa nga P500 si bisan kinsa nga makalapas ordinansa nga gipatuman sa kagamhanan.

Si Jerusalem miingon nga sukad pa sa miaging semana ang iyang buhatan midestino og lima ka mga eco warden nga maoy gitahasan sa pagbantay sa palibot sa bag-ong merkado sa pagsiguro sa kalimpiyo niini.

Samtang si Market Administrator Musoline Suliva sa iyang pamahayag miingon nga ang mga basura sa merkado adto ilabay sa ilang kaugalingong Material Recovery Facility nga nahimutang usab duol sa e-jeepney terminal dili kaayo layo sa merkado.            

Gitataw ni Suliva nga sanglit daghan man kaayo ang mga gibahig nga mga basura nga madunot ug dili madunot ug kaduha lamang ka higayon ang paghakot niini matag adlaw, nagtakda nalang sila og mga oras sa pagpanghakot niini. WC - (BANAT NEWS)