Color coding sa sakyanan ipatuman

CEBU, Philippines - Ang color coding sa mga sakyanan sa kadagatan sa lalawigan sa Sugbo ipatuman sa gamhanan kun kaaprobahan na ang anti- fishing ordinance nga gipangamahanan ni Board Member Thadeo Ouano sa ikaunom nga distrito. Si Ouano kinsa maoy chairman sa committee on environment sa hunta probinsiyal sa Sugbo naniid sa pulso sa katawhan atol sa public hearing sa ordinansa kalabot niini nga gipahigayon didto sa lungsod sa Cordova sa miaging adlaw.

Ang maong public hearing gitambongan usab sa mga mananagat gikan sa lungsod sa Cordova ug uban pang mga lungsod ug dakbayan sa lalawigan sa Sugbo.

Lakip usab sa mitambong niini   mao ang mga commercial fisher gikan sa lainlaing dapit sa lalawigan sa Sugbo.

Ang pagpatuman sa color coding sa mga sakyanan sa kadagatan gitumong aron dali rang mailhan ang mga sakyanan nga makalapas   sa balaod sa kadagatan. Gilatid sa maong ordinansa ang P5,000 nga multa sa matag mananagat nga madakpan sa akto sa paghimo og illegal nga pagpanagat nga maglakip usab sa pagsakmit sa ilang sakyanan ug mga kahimanan sa pagpanagat.

Si kanhi Provincial Board Member Victor Maambong nga consultant ni board member Ouano mipasabot nga ang mga barangay, lungsod o dakbayan diin madakpan ang malapasong mananagat hatagan usab og bahin sa multa nga ibayad sa madakpang mananagat.

Gitataw ni Maambong nga ang multa nga ibayad sa mga mananagat deretsong mosulod sa panudlanan sa nasudnong kagamhanan.  WC - (BANAT NEWS)