CEBU, Philippines - Patay ang usa ka fried chicken vendor human gihunongan ug gipusil sa tulo ka mga lalaking nagmotor samtang naninda kini sa gawas nga bahin sa eskuwelahan sa barangay Balirong siyudad sa Naga niadtong Huwebes sa alas 3:00 sa hapon. Ang biktima mao si Marlon Capablanca, 27, nagpuyo sa barangay Mainit Naga ug pagpamaligya og fried chicken ang iyang pangita.
Tulo ka mga lalaking sakay og motorsiklo nga kolor itom ug nag-angkasay ang responsable sa krimen kinsa padayon pang gipangita sa kapolisan.
Matud ni PO3 Francisco Codiñera sa Naga City Police Station dihang nahinabi sa Banat News base sa impormasyong gihatag kanila sa usa ka testigo gikan sa Lutopan, Toledo City ang motor nga gisakyan sa mga mamumuno. Pag-abot sa maong lugar kalit kining mi-u turn ug hapit pa mabanggai og laing sakyanan tungod sa pagdalidali ug ang duha ka angkas nanganaog dayong duol sa biktima ug gipusil kini sa ulo.
Padayun pa ang imbestigasyon sa kapulisan sa krimen. EIM - (BANAT NEWS)