Ballesteros ug uban pa buot ipaapil sa imbestigasyon

CEBU, Philippines - Gihangyo sa kampo ni Joselyndo Jabagat pinaagi sa iyang legal counsel nga si Atty. Gloria Lastimosa-Dalawampu ang National Bureau of Investigation (NBI) nga apilon sa imbestigasyon ang pipila ka mga sakop sa Sinulog Foundation Inc. (SFI). Si Dalawampu nga nahinabi kini sa Banat News miingon buot nilang ipaapil sa imbestigahon ang executive director sa SFI nga si Ricky Ballesteros, Maria Virgie Santander (office clerk), Marie Angeli Pascual (kahera) ug Helen Talisik nga maoy mohulip ni Pascual kun wala kini.

Sumala pa ni Dalawampu nga ang nahisgutang mga tawo adunay kasayuran kabahin sa maong kwarta ug sa kombinasyon sa numero sa vault. “Nagduda gyud ko nga kanang kwartaha wala na makaabot sa admin vault,” matud pa ni Dawampu nga sukwahi sa migawas nga hitabo nga gilungkab ang vault sulod sa maong buhatan ug nahanaw ang P1.6 milyon nga kwarta ug gipasangil ngadto sa iyang kliyente kinsa maoy gwardiya nianang mga orasa.

“ Na-trauma na gyud siya og maayo, mahadlok na gani siya maggwardiya kay mapasanginlan napud unya siya,” pasabot pa ni Dalawampu ug midugang nga plano nilang mosang-at og kasong kriminal ug administratiba batok sa kapolisan tungod sa pagsikop kaniya nga wala’y igong basehan. Dako gyud og damage nga nahimo, ang kauwawan nga gihatag sa iyang pamilya,” matud pa ni Dalawampu.

Samtang si Insp. Rolando Pinili, hepe sa Theft and Robbery Section mibutyag nga andam silang moatubang sa bisan unsang kaso nga isang-at sa kampo ni Jabagat.

Kahinumduman nga gibasura ni city prosecutor Gandhi Truya ang kasong gisang-at sa kapolisan nga Qualified Theft batok kang Jabagat tungod kay wala’y igong basehan ug lig-ong ebidensya nga magtumbok kang Jabagat sa nahanaw nga kwarta. (BANATNEWS)