CEBU, Philippines - Tungod lang sa away sa iyang kaipon, usa ka 39-anyos nga lalaki ang naghikog pinaagi sa paghigot og pisi sa iyang liog sulod sa pinuy-anan niini diha sa sitio Manga sa barangay Bulacao ning siyudad kagahapon sa buntag.
Ang naghikog giila sa kapulisan nga mao si Sadrax Abay-abay, 39, walay trabaho ug buwag sa asawa apan karun duna nay kapuyo.
Sa imbestigasyon nilang SPO1 Victor Ruel Ayuman ug PO3 Geoffrey Gutual ug mga kaubanan sa Homicide Section sa Cebu City Police Office (CCPO) nagbutyag nga si Wilfreda,65, inahan sa naghikog mitug-an nga iyang nakit-an ang iyang anak nga nagbitay na sulod sa balay.
Sa wala pa maghikog si Abay-abay giingong nag-inom kini niadtong Miyerkules sa hapon ug nianang pagkagabii nagkalalis sa iyang kapuyong si Arlene Raga.
Mibahad si Abay-abay nga maghikog apan wala lang panumbalinga sa inahan kay kanunay na kining mobahad kaniadto kun sila magkalalis sa iyang kapuyo.
Matud pang Gutual dili maayo ang relasyon sa ginikanan sa namatay ug sa kapuyo niini.
Ang kapuyo niining si Arlene gipalakaw sa balay niadtong Miyerkules sa gabii ug gipadala ang ilang duha ka anak ni Abay-abay nga nagpangidaron tulo ug usa ka tuig aron ilikay sa gubot tali sa mga kabanay sa naghikog. (BANATNEWS)