CEBU, Philippines - Swerteng nakamata ug nakasukol ang usa ka 26-anyos nga dalaga sa lalaking mikamang ug misuway og lugos kaniya nga nasutang iyaha ra diay 18-anyos nga ig-agaw diha sa usa ka barangay sa siyudad sa Carcar niadtong Miyerkules sa alas 2:45 sa kaadlawon.
Ang biktima ug ang suspek parehong nagpuyo sa usa ka balay sumala pa ni PO1 Ed Clint Maranan, ang desk officer sa Carcar City Police Station dihang nahinabi sa Banat News.
Matud pa ni Maranan base sa imbestigasyon sa Women’s Desk nahinanok sa pagkatulog sa kwarto niini ang biktima dihang sekretong misulod ang suspek nga diha miagi sa kural sa kasikbit nga eskuylahan.
Gikan sa kural misulod ang suspek agi sa bintana sa kwarto sa biktima ug gihimo ang malaw-ay niyang plano sa ig-agaw apan nakamata kini dihang gidat-ogan sa suspek ug misinggit pagpangayo og tabang dungan sa pagsukol.
Ang suspek nga natarantar daling misibat apan ang mga tanod sa maong lugar abtik nga nakarespondi ug nadakpan ang suspek kini ug diha pa mahibaw-ing ig-agaw ra sa biktima.
Ang suspek gihatud ngadto sa kapolisan ug gipasakaan og kasong acts of lasciviousness.(/EIM) (BANATNEWS)