4th SP sa Talisay nakagama'g 402 ka balaod

CEBU, Philippines - Ang mga miyembro sa ika-upat nga Sangguniang Panglungsod sa dakbayan sa Talisay   nakagama og 402 ka mga resolusyon ug 32 ka mga ordinansa sa unang katunga sa ilang termino.

Base sa record sa SP Secretary, si Konsehal Rodi Cabigas kinsa maoy chairman sa committee on infrastructure maoy may labing daghang napasar nga mga resolusyon nga mikabat og 129, samtang 11 usab ang mga ordinansa.

Kasagaran sa napasar nga resolusyon ni Cabigas mao ang alang sa simple subdivision, preliminary approval ug location clearance (PALC) ug development permit.

 Usa sa mga ordinansa ni Cabigas mao ang pag-amendar sa Revenue Code sa dakbayan nga napasar niadtong Oktubre 13, 2011.

Si Cabigas kinsa anaa na sa iyang ika-tulong termino karon maoy nangamahan sa resolusyon nga naghatag og pagtugot kang Mayor Socrates Fernandez nga makiglambigit og memorandum of agreement tali sa Department of Public Works and Highways (DPWH) alang sa renovation sa merkado publiko sa dakbayan nga naaprobahan niadtong Oktubre 18, 2011.

Samtang si Bise Mayor Alan Bucao mao usab ang nagsunod kang Cabigas nga may 72 ka napasar nga resolusyon ug ordinansa.

Si Bucao maoy nangamahan sa Traffic Code sa siyudad niadtong Septiyembre 7, 2010 ug sa ordinansa nga nagdili sa mga establisamento sa Talisay sa paggamit og mga plastic bag ug styrofoam.

Ang maong ordinansa naaprobahan niadtong Pebrero 15, 2011 apan wala pa kini mapatuman.

Ang first termer nga si Konsehal Celiapo Cabuenas ug ang third termer nga si Konsehal Bernard Odilao nakagama   og 41 ug 30 ka mga balaod ang usa’g-usa.

Ang resolusyon ni Cabuenas kasagaran kabahin sa financial assistance samtang ang kang Odilao mao ang kabahin sa natural resources.

Si Odilao maoy chairman sa committee on environment.

Si Konsehal Dennis Basillote nakagama og 29 ka mga resolusyon ug ordinansa, samtang 27 usab ang kang Konsehal Choy Aznar.

Ang apo ni Kongresista Eduardo Gullas nga si Eduardo Gullas III nakagama og 18 ka mga balaod samtang ang presidente sa Association of Barangay Council nga si Charles Basillote adunay 16 ka mga balaod.

Si Konsehal Edward Alesna adunay 12 ka mga balaod nga nagama diin usa niini mao ang kabahin sa ordinansa nga nagsilot sa mga mag-inom sa mga publikong lugar nga napasar niadtong Pebrero 15, 2011.

Samtang ang presidente sa Sangguniang Kabataan Federation nga si Carmel John Burlas walay bisan usa ka resolusyon nga napasar.

Ang mga konsehal nga sakop sa oposisyon nga si Romeo Villarante nakagama og 11 ka mga balaod diin usa niini mao ang iyang hangyo ngadto sa Korte Suprema nga ang bar exam alang sa mga examinee sa Visayas ug Mindanao anhi ipahigayon sa dakbayan sa Sugbo.

Si Villarante nangamahan usab sa balaod sa siyudad nga Anti Red Tape Law.

Ang iyang mga kaalyadong konsehal nga si Danny Caballero nakapasar og   lima ka mga resolusyon ug upat kang Val Ylanan.

Ang maong mga konsehal nga ubos sa landong sa oposisyon walay gihuptan nga mga komitiba apan miyembro sila sa mga komitiba nga gihuptan sa mga konsehal nga ubos sa administrasyon. (BANAT NEWS)