Dugaduga imbestigahon sa Konseho

CEBU, Philippines - Gipatawag sa konseho sa Siyudad sa Sugbo si Public Information Officer Carlo Dugaduga aron paesplikahon kini kung unsa gyud ang nag-unang trabaho sa iyang buhatan.

Si Dugaduga gitakda nga moatubang sa mga konsehal karong Pebrero 8. Nagkanayon si Konsehal Alvin Dizon nga iyang   naobserbahan nga ang buhatan ni Dugaduga nagsilbing makinarya sa propaganda ni Mayor Michael Rama sa pamolitika.

Sumala pa sa konsehal nga giserbisyohan ni Dugaduga ang tibuok siyudad ug dili lang kay si Rama.

Dugang pa ni Dizon nga ang newsletter sa City Hall nga Bayanihan Advocates Rallying for Unity and Good Governance pulos nagpakita sa mga kalihokan ni Rama ug wala gyud malakip ang gipamuhat sa mga konsehal.

Naumol ni Dizon ang ideya nga ipatawag si Dugaduga human niya masayri nga ang PIO maoy nagpasiugda sa mga press briefing sa pipila ka mga department head sa miaging semana.

Sa mga press briefing nga gihimo mipalanog ang ubang mga hepe sa departamento sa ilang kasagmuyo   sa gibuhat sa konseho sa paglaslas sa ilang mga budget.

Gumikan niini gibati og kapikal ang konseho ilabi na si Vice Mayor Joy Agustus Young nga maoy    nangulo sa konseho sa siyudad.(/WC)(BANAT NEWS)