Davide nasagmuyo kang Osmeña

CEBU, Philippines - Gikasubo sa Provincial Chairman sa Liberal Party (LP) sa Sugbo Hilario Davide III ang pamahayag ni kanhi Senador Sonny Osmeña nga nagpahibawo sa pag-withdraw sa suporta niini kaniya   sa plano niyang pagpapili pag-usab sa pagka-gobernador sa Sugbo unya sa 2013 election.

Atol sa gipatawag nga press conference ni Davide kagahapon sa buntag gipahungaw niini ang iyang kasagmuyo sa gibuhiang pamahayag sa kanhi senador nga kauban niya sa LP dinhi sa Sugbo. Apan giklaro ni Davide nga dili kini makapabugnaw sa iyang tinguha nga magpapili og balik pagka -gobernador sa Sugbo unya sa eleksiyon sa sunod tuig ubos gihapon sa LP.

Si Davide milansar sa pagka-gobernador atbang ni Gobernador Gwendolyn Garcia kaniadtong piniliay sa tuig 2010 apan napildi kini og kaping 90 mil botos sa naulahi.

Masaligon hinuon si David nga mahilot ra ang maong kasungian ug kun dili na makombinser nila ang kanhi senador, alang niya wala kaayo kini dakung epekto sa partido tungod kay nagpadayon man usab ang pagpang- recruit nila og dugang mga politiko nga mo-ipon sa partido agi og pangandam sa eleksiyon sa sunod tuig.

Sa isyu ni Osmeña nga gibasihan sa pagbawi sa suporta niini   ngadto kang Davide bahin sa giingon niyang kapakyas sa pagpa- relibo sa district Engr. sa Department of Public Works and Highways (DPWH) sa siyudad sa Toledo ug sa City Treasurer sa maong siyudad nga wala kahatagi og aksyon ni Davide, miawhag hinuon siya sa kanhi senador pagduso og pormal nga reklamo batok sa hingtungdang mga opisyal aron aduna silay balidong basihanan sa pagpa-relibo niini didto sa ilang ulohang buhatan.

Nunot niini gibutyag usab ni Deputy Speaker Irin Tanada atol sa interview sa Bantay Radyo kagahapon nga bisan pa sa maong kalamboan nagpabilin gihapon ang suporta ug kompyansa sa partido Liberal ngadto kang Davide nga maoy ilang provincial chairman sa partido. Matud ni Tanada nga katapusan silang nagkita ni Davide niadtong Enero 29 atol sa anibersaryo sa LP diin didto nagkahinabi si Davide ug si Presidente Benigno Aquino III ug nagkasulti sila kabahin sa pagpangandam sa partido sa umaabot nga piniliay sa sunod tuig. Apan gilaoman ni Tanada nga mahilot ra ang maong kasungian alang sa kahiusahan sa partido administrasyon dinhi sa Sugbo. (BANAT NEWS)