Traysikol natuwad tulo angol

CEBU, Philippines - Nalandig sa tambalanan ang usa ka inahan ug ang duha niini ka menor de edad nga mga anak human malintuwad ang gisakyan nilang traysikol didto sa sitio Kimba Barangay Cansojong, dakbayan sa Talisay, niadtong Martes sa gabii.

Ang biktima mao si Cecelia Bajan, 32, ug ang iyang anak nga babaye nga si CJ ,8, ug anak niyang lalaki nga si Zyan 4, pulos molupyo sa nahisgutang barangay. Samtang ang drayber sa traysikol nga ilang gisakyan nga nagtangag sa plakang GW-4806 mao si Ricky Raga, 32, nga taga barangay San Isidro, Talisay.

Si PO2 Rosauro Pasumala sa traffic division sa dakbayan nagkanayon nga sa imbestigasyon ni SPO4 Ernesto Navales nasayran nga ang mga biktima didto manakay sa Tabunok Elementary School paingon sa Kimba apan sa pag-abot nila sa duol na sa ilang balay kalit nga napalyar ang makina sa traysikol ug nalintuwad kini sa karsada kay wala na makontrolar sa drayber ang dagan niini. Ang tulo ka biktima daling gihatud ngadto sa Talisay City District Hospital apan gibalhin kini ngadto sa Vicente Sotto Memorial Medical Center sa dakbayan sa Talisay. (BANAT NEWS)