Warden ug Jailguard sa CPDRC tangtangan
CEBU, Philippines - Misaad si Governor Gwendolyn Garcia nga iyang ipatangtang sa katungdanan ang mga jailguard sa Cebu Provincial Detention and Rehabilitation Center ( CPDRC) kun makaeskapohan kini og piniriso.
Matud pa sa gobernador nga mao na kini karon ang iyang bag-ong polisiya nga ipatuman sa CPDRC aron pagsiguro nga maundang na ang pagpangeskapo sa mga piniriso human sa ilang hearing sa kaso sa korte didto sa kalungsoran.
Si Gobernador Garcia miingon nga iyang nakita nga nahimo nang kinaiya sa mga jailguard nga naghinubra ra ang kalugak sa pagbantay sa mga piniriso nga motambong sa bista sa ilang kaso sa kalungsoran tungod kay pipila ka adlaw human sa pag-eskapo mosurender ra man usab kini.
Ang gobernador miingon nga iya na nga gimanduan ang Committee on Discipline sa pag-imbestigar sa mga jailguard nga mibantay sa sunod- sunod nga hitabo sa pangeskapo sa mga piniriso nga mitambong og hearing sa ilang kaso didto sa kalungsoran.
Mipasidaan ang gobernador nga sa higayong mamatud-an ang pagpabaya sa maong mga guwardiya diha-diha iya kining palagputon sa serbisyo.
Samtang gitumbok sa gobernador nga sa maong sitwasyon dili usab makalingkawas ang warden sa CPDRC kay gikinahanglang makapasabot giunsa niya pagdumala ang CPDRC .
Laing lapso nga nakita sa gobernador sa warden sa prisohan sa lalawigan mao ang nadiskobrehang mga kontrabando sulod sa prisohan sama sa cellphone, mahait nga hinagiban ug uban pang illegal nga nakasulod sa CPDRC.
Ug sama sa mga boluyagong mga jailguard, mahimo nga lakip nga mapahamtangan og tukmang disciplinary action ang warden sa higayong mamatud-an sa imbestigasyon ang kalambigitan niini sa mga anomalusong buhat sulod sa maong prisohan.(/WC)(BANAT NEWS)
- Latest
- Trending