Taxi nga nangobra'g sobrang plete dakpon

CEBU, Philippines - Gipahimangnoan sa Land Transportation Franchising and Regulatory Board (LTFRB)7 ang mga taxi unit nga mag-amping ilabi na karong Valentine’s Day tungod sa programa nga ilusad nga “Oplan I Love You” sa maong adlaw.

Gibutyag ni LTFRB-7 Regional Director Ahmed Cuizon sa Banat News nga ang maong programa maoy labing una nga ipatuman nila nga gitumong aron pahugtan ang pagmonitor sa mga drayber kinsa mag- overcharging o maningil og sobra nga plete sa mga pasahero.

Giangkon ni director Cuizon nga sa Valentine’s Day sa niaging tuig nakadawat sila og daghang reklamo gikan sa mga pasahero ilabi na sa mga managhigugmaay nga nag- date ug mi -check in sa mga hotel nga pangayoan sila og sobra nga plete nga mas dako sa naandang pletehan.

“Basi sa reklamo nga among nadawat nga adunay ubang mga pasahero nga gipangayoan og P200 o sobra pa niini ilabi na kadtong mogawas nga maghigugmaay gikan sa mga hotel ug motel”, dugang ni Cuizon.

Matud niya nga karong Pebrero 14, mopakatap sila og dugang personnel sa palibot sa mga motel, hotel, beach resort sa Lapulapu ug uban pa, ug mga public plaza nga suroyan sa mga maghigugmaay nianang adlawa.

Miingon si Cuizon nga tag P2,500 ang multa nga ilang ipahamtang sa mga drayber sa taxi nga ireklamo ug mamatud-ang nag- over charging sa mga pasahero niini.

Nunot niini giawhag sa LTFRB-7 ang mga tagdumala sa hotel, motel, beach , ug uban pa sa pakig-alayon sa mga otoridad pinaagi sa pagpadangat niining maong impormasyon ngadto sa mga drayber sa taxi.

Gipahimangnoan ni Cuizon ang mga drayber sa taxi nga angay nilang mahalon ang ilang mga pasahero tungod kay mao kini ang ilang panginabuhian.(WC)(BANAT NEWS)