CEBU, Philippines - Gigapos, gihuboan sa sapot dayon gihagbong sa daplin sa dalan ang usa ka drayber sa taxi nga gitulis sa tuo ka armadong mga lalaki didto sa barangay Marigondon, dakbayan sa Lapulapu sa miaging kaadlawon.
Ang biktima mao si Semeon Garbo, 59, minyo, nga taga lungsod sa Consolacion ug drayber sa Holiday Taxi nga nagdala sa plate number 769.
Si SPO1 Mateo Pascual sa Presinto 2 sa Lapulapu City Police Office (LLCPO) nga nagbase sa barangay Mactan nga nahinabi sa Banat News miingon nga tulo ka armadong mga lalaki nga pulos batan-on, pution ang usa ug minuslim ang tuno sa sinultian misakay sa taxi sa biktima didto sa barangay Pusok ug nagpahatod ngadto sa barangay Marigondon.
Apan pag-abot nila sa maong dapit milanit kini sa ilang mga armas de fuego ug gition ngadto sa biktima uban sa pagdeklarar nga tulis.
Ang biktima kinsa wala mosukol gitabangan og gapos sa straw nga gamitonon nga pangbugkos sa driver kun adunay kargamento ang iyang pasahero .
Dihang nagapos na gikuha dayon sa mga tulisan ang P2,500, nga agi sa biktima sa iyang pamasahero, 2 ka Nokia cell phone, relo de pulso .
Wala pa matagbaw ang mga tulisan, gihubo niini ang t-shirt ug karsones sa biktima ug brief nalay gibilin nga nagtapot sa lawas . Unya gipalingkod kini sa luyong lingkoranan sa iyang taxi, samtang gipadagan kini sa usa sa mga tulisan paingon ngadto sa Mactan.
Apan sa ilang pag-abot sa atubangan sa Vistamar Subdivision, gihagbong sa maong mga tulisan ang biktima sa daplin sa karsada. Ang biktima miingon nga gihinayhinay na lang niya sa pagtangtang ang mga gapos sa iyang kamot ug tiil ug naglakaw paingon sa Presinto 2 ug didto isumbong ang nahitabo kaniya.
Si SPO1 Pascual miingon nga ang mga barangay tanod na sa Basak sa maong dakbayan maoy nakakita sa taxi sa biktima nga giabandonar sa mga tulisan sa maong lugar. Padayon pang gipangita sa mga kapolisan ang mga tulisan. - BANAT NEWS