Mitulis sa taxi driver ilhan

CEBU, Philippines - Nailhan na sa kapolisan sa dakbayan sa Talisay ang usa ka tulisan kinsa misuway og tulis ug midunggab sa usa ka drayber sa taxi niadtong Sabado didto sa sitio Kalmar, barangay Lawaan I, sa nahisgutang siyudad.

Ang suspetsado kinsa usa ka ex-convict mao si Alex Rangkas, hingkod , residente sa nahisgutang barangay kinsa padayon pang gipangita sa kapolisan karon.

Sa ulahing follow-up operation nila ni PO3 Benedicto Lasque, PO2 Roy Lofranco ug PO1 Euwen Pitogo nasayran nga si Rangkas mitago didto sa dakbayan sa Toledo sa lugar sa iyang kapuyo.

Si Supt. Eddie Recamara, hepe sa Talisay City Police Station nga nahinabi sa mga tigbalita kagahapon mibutyag nga ilang nasayran nga si Rangkas bag-o lang nakagawas gikan sa Talisay City Jail human makombikto sa kasong robbery.

Matud ni Recamara nga padayon pa ang ilang hot pursuit operation batok sa suspetsado ug posibleng pasakaan nila kini og kasong robbery with homicide tungod sa iyang pagsuway og tulis ug pagdunggab kang Angel Gapate, 46, drayber sa Sheena Taxi nga nagtangag sa plakang GXD-920.

Kahinumdoman nga niadtong Sabado sa kaadlawon ang suspetsado nagpakaaron-ingnong pasahero ug mipara ug misakay sa taxi ni Gapate didto sa barangay Mabolo, dakbayan sa Sugbo ug nagpahatud ngadto sa dakbayan sa Talisay.

Apan pag-abot didto sa sitio Kalmar sa lugar kalit kining   mideklara nga tulis uban sa pagtion og kutsilyo ngadto sa biktima, kinsa nadunggaban gyud kay misukol

Si Gapate kinsa nakaangkon og mga samad dinunggaban sa iyang lawas daling gidala sa mga estambay ngadto sa Talisay City District Hospital apan gibalhin kini ngadto sa Vicente Sotto Memorial Medical Center tungod sa talandugon niyang kahimtang.   - BANAT NEWS