Young mireklamo sa mga dept. head

CEBU, Philippines - Gibutyag ni Bise Mayor Joy Augustus Young nga dili angayang magpunay og reklamo ang mga department head sa executive department sa Cebu City Hall kalabot sa paglaslas sa ilang mga budget.

Sumala pa ni Young nga nalakip sa gilaslasan og budget ang mga gastohonon sa konseho sa siyudad sa Sugbo.

Depensa pa sa bise mayor nga patas ang pagtratar sa mga konsehal busa mismo ang ilang budget lakip usab sa ilang gilaslasan.

Ang konseho sa siyudad sa Sugbo miduso og kapin sa P70 milyones nga budget alang sa 2012 apan P60 milyones ray ilang giaprobahan gumikan kay nag-agad ra sila sa panudlanan sa siyudad.

Pipila sa operasyon sa konseho nga maapektohan mao ang ilang pagpahigayon og mga training ug mga opisyal nga biyahe ngadto sa ubang nasud.

Gitataw hinuon ni Young nga bisan wala’y budget ang ilang mga biyahe nga opisyal, mangita sila og mo-sponsor kanila.

Si Young wala mahimuot sa giingong pagreklamo sa pipila ka mga department head sa kagamay sa ilang budget.

Gani karong adlawa, ipatawag sa konseho si Stella Ygonia aron paesplikaron sa gibutyag niini ngadto sa mga sakop sa media nga matud pa naapektohan ang ilang mga programa sa katawhan gumikan sa kakuwang sa ilang budget.

Unang misaysay ang maong department head nga ang ilang operation tuli karon P300 mil ray gihatag nga budget kanila, gikan P4 milyones nga ilang gipangayo , 20 ra ka bata sa matag barangay ang makabenepisyo niini.

Naglaom si Ygonia nga makahangyo pa sila og supplemental budget nga ikadugang nila sa ilang   mga programa kun mahurot na kining P300 mil nga gahin.  - BANAT NEWS