Magtutudlo gi-warningan dili magtinunto

CEBU, Philippines - Gipasidan-an ni Bise Mayor Joy Augustus Young ang mga magtutudlo nga dili magtinonto sa ilang trabaho aron dili sila magkaproblema.

Ang maong pasidaan gihimo ni Young human siya makadawat og kopya sa report gikan sa Department of Education (DepEd) kalabot sa usa ka magtutudlo sa sekondarya sa usa ka pampublikong tunghaan sa Siyudad sa Sugbo kinsa gipahamtangan og silot gumikan kay nagtinapolan kini sa iyang trabaho.

Ang maong magtutudlo gisilotan nga mobayad og bali’g duha ka buwan niya nga suweldohan sa iyang pagka-maestra.

Nasayran nga kanunay nga ma-late sa iyang klase ang nahisgutang magtutudlo nga nagbase sa tunghaan sa habagatang bahin sa siyudad.

Base sa gikuptan nga dokumento ni Young, adunay mga higayon nga ang magtutudlo na-late og duha ka oras sa iyang klase.

Sumala pa ni Young nga makaapekto kaayo sa klase ang maong sitwasyon ug ang mga tinun-an niini maoy maalaot sanglit wala na sila’y makat-onan.

Ang bise mayor kinsa chairman usab sa committee on education sa konseho miingon nga dako kaayo ang papel sa mga magtutudlo sa kaugmaon sa bata busa kinahanglan nga mohatag usab kini og maayong kalidad sa pagtudlo ngadto sa mga tinun-an.

Saludo si Young ngadto sa mga magtutudlo nga adunay dedikasyon sa ilang mga trabaho. - BANAT NEWS