Rebel leader gibalhin na sa Centcom

CEBU, Philippines - Pormal nang gibalhin kagahapon sa buntag gikan sa Cebu Provincial Detention and Rehabilitation Center (CPDRC) ngadto na sa detention cell sa Armed Forces of the Philippines (AFP) Central Command ang kanhi lider sa New Peoples Army (NPA).

Si Ramon Patriarca gidala sa mga jailguards sa CPDRC kagahapon sa buntag ngadto na sa detention cell sa Centcom human wala mahinayon niadtong Enero 25 ang plano untang pagbalhin kaniya sa maong kampo tungod kay wala maandam ang karsel nga iyang kabutangan.

Ang korte mimando nga ibalhin si Patriarca sa prisuhan sa Centcom tungod sa giingong pagpahigayon niini og lectures kabahin sa mga kalihukan sa NPA ngadto sa mga bilanggo sulod sa prisuhan sa Danao City Jail.

Si Patriarca kinsa sukad nga mahibaw-ing ibalhin siya og bilanggoan wala na mokaon ug tubig nalang ang iyang giinom agi og pagpakita sa iyang pagsupak hangtud nga dili siya ibalik sa Danao City Jail.

Kagahapong adlawa maoy ikapito na ka adlaw nga hunger strike ni Patriarca. Ang mga kabanay ni Patriarca midangop na sa Commission on Human Rights ug mireklamo batok ni Gob. Gwendolyn Garcia ug mga kadagkoan sa bilanggoan.

“Ug naay mohatag nako diri tubig, kamay ug asin ok naku diri,” matud pa ni Patriarca kagahapon sa buntag sa bag-o niyang selda sa Centcom.

Sa wala pa siya isulod sa detention cell gipaubos una siya sa eksaminasyon sa doktor ug nurse sa Centcom ug nasuta nga 76 nalang ang iyang blood sugar nga mas ubos na kaayo sa normal nga 100 nga blood sugar sa usa ka tawo.

Hugtanong gihimakak ni Patriarca nga iyang gitudloan ang mga kauban niyang piniriso sa Danao City Jail sa kalihokan sa rebeldeng komunista ug bugtong niyang gituki mao ang isyu sa kahimtang nila sulod sa maong bilanggoan.

Matud niya ang budget sa pagkaon sa matag adlaw sa kada usa ka piniriso P80 apan ang gihatag nilang pagkaon nagkantidad lang og P33 ngadto sa P38.

Si Lt. Col. Christopher Tampus, tigpamaba sa Centcom nagkanayon nga nihatag ang CPDRC og pagkaon ni Patriarca bali’g usa ka buwan. Mahimo sad siyang bisitahon sa mga kabanay ug abogado diha sa kampo.

 Si Patriarca nadakpan niadtong Pebrero 5 sa barangay Casili lungsod sa Consolacion pinasikad sa warrant of arrest nga giisyu sa korte sa Danao City nga si Judge Sylva Paderanga sa Regional Trial Court Branch 25 tungod sa kasong rebelyon.

Si Patriarca gipasanginlang maoy kanhi deputy secretary sa Komiteng Rehiyonal Sentral Bisayas ug finance officer ug pangulo sa NPA taxation bureau nga nagbase sa Negros. (/EIM)(BANAT NEWS)