Duna nay lead pag- ambush sa jailguard

CEBU, Philippines - Dili na moumol og task force ang hepe sa kapulisan sa probinsya sa Sugbu aron motutok sa imbestigasyon sa pagpusil patay sa jailguard sa Cebu City Jail nga si Leo Labata niadtong Lunes sa alas-5 sa hapon diha sa sitio Bajak sa barangay Poblacion sa lungsod sa Liloan.

Si Sr. Supt. Patrocinio Comendador nagkanayon sa Banat News nga duna na silay ‘gamay’ nga lead sa maong krimen ug gisubay na kini karon sa Provincial Investigation and Detective Management Branch (PIDMB) ug Provincial Intelligence Branch (PIB).

Lakip sa gipangitang kooperasyon sa imbestigasyon maggikan diha mismo sa Cebu City Jail aron manguha og impormasyon ug background sa trabaho sa biktima diha sa maong bilanggoan. 

Nasayran si Labata giingong sayo kining mibiya sa Cebu City Jail ug gikuha niini sa tunghaan ang iyang 10-anyos nga anak lalaki ug gipasakay sa traysikol.

Nahibulong ang anak nganong gipasakay siya sa traysikol sa iyang amahan sanglit naandan naman kini nga paangkason siya niini.

Dihang nag-una ang amahan sa traysikol nga gisakyan sa anak, kalit lang kining gipusil sa wala mailhing duha ka tawong nagsakay og motorsiklo pipila nalang ka metros sa ilang panimalay.

Si JO1 Reyukie Plaza kauban ni Labata nga nahinabi sa Banat News mihulagway sa naulahi nga usa ka maayong tawo ug kugihan sa trabaho apan estrikto sa mga polisiya sa CCJ si Labata ilabi na ngadto sa mga mobisitang kabanay sa mga priso. (BANAT NEWS)