CEBU, Philippines - Pagkapriso sa tibuok kinabuhi ug pagbayad og P3 milyones ang silot nga gipahamtang ni Lapu-Lapu City RTC Branch 27 Presiding Judge Toribio Quiwag batok sa Kenyan national nga si Asha Atieno Ogutu.
Kagahapong adlawa gibasa ang desisyon kalabot sa kalapasan sa Republic Act 9165 ni Oguto tungod sa nasakpang tulo ka kilong shabu diha sa bagahe niini pagsulod niini sa Pilipinas agi sa Mactan-Cebu International Airport niadtong Septiyembre 29, 2011.
Atol sa pagbasa sa hukom ug napasabot kaniya ang desisyon nakahilak si Oguto ug mitiyabaw ug nakuyapan apan maayo nalang nga nasalo siya sa mga jail guards.
Si Oguto nadakpan sa mga ahente sa National Bureau of Investigation (NBI) nga una nang nakadawat og impormasyon kabahin sa maong kontrabando nga ipalusot diha sa MCIAA.
Si Oguto nga nangangkong mobakasyon dinhi sa Cebu kusganong miinsister nga biktima ra siya kay wala siya masayod sa sulod sa iyang bagahe nga gihatag kaniya sa laing Kenyan.
Ang abogado ni Oguto nga si Atty. Ricardo Amores mibutyag nga moduso sila og Petition for Review ngadto sa Korte Suprema tungod kay nagtuo siyang inosente si Oguto. (BANATNEWS)