24 ka vintage bomb higpit gibantayan
CEBU, Philippines - Kinahanglan bantayan ang nahabiling wala mapabutong vintage bomb nga nakubkuban diha sa South Road Property (SRP) tungod kay posibleng kawaton kini ug ibaligya sa junk shops o ba kaha mapunta na hinuon sa mga dautang tawo.
Kini maoy pamahayag ni Lt. Col. Christopher Tampus ang tigpamaba sa Armed Forces of the Philippines (AFP) Central Command kalabot sa pagbantay sa mga sakop sa Mambaling Police Station sa nahibiling 24 ka bomba diha sa SRP.
Nagpaabot pa ang Centcom ug dakbayan sa hangyo nila sa kaulohan nga mopalit og125 ka buok nga C4 nga gamiton aron pabuthon ang nahibiling bomba.
Kagahapon ang pangulo sa Explosives Ordnance Division (EOD) sa Central Command mitambong sa tigom sa Cebu City Hall alang sa nagpadayong pagtuki kung unsaon ang nahabiling mga bomba.
Si Tampus mitataw nga dili sila uyon nga ibutang sa museum ang mga bomba nga gisugyot sa grupo sa mga beterano sa Ikaduhang Kalibutanong Gubat tungod sa risgo niini sa mga tawong mobisita.
Ug ang ikaduha mao nga lisod kining i-difuse o ablihan aron tangtangon ang explosive contents sa sulod niini tungod sa grabeng kakaraan na niini.
“Centcom is not recommending nga ibutang sa museum, kinahanglan ang safety sa katawhan, ug unsay mahitabo kinahanglan walay maapektuhan,” pasabot pang Tampus. (BANATNEWS)
- Latest
- Trending
