Sikyu sa Sinulog Foundation giabswelto

CEBU, Philippines - Human sa 13-adlaw nga pagkapriso gipakawalay sala sa piskalya ang gwardiyang si Joselyndo Jabagat human gibasura ni City Prosecutor Gandhi Truya ang kasong qualified theft nga gipasaka kaniya tungod sa paglungkab sa buhatan sa Sinulog Foundation sa Cebu City Sports Center.

Ang piskalya wala makakita og lig-ong basehan bisan paman sa mga saksi nga mibarog batok kang Jabagat kalabot sa mga sirkumstanya sa paglungkab nga diin nahanaw ang P1.6 milyon sa maong buhatan.

Sa siyam ka pahinang resolusyon ni Truya, kini nagkanayon nga walay bisan usa sa tanang mga saksi ang aktwal nga nakatumbok kang Jabagat nga maoy mikuha sa kwarta.

Giklaro usab ni Truya nga limitado kaayo ang impormasyon sa affidavit nila ni Ricky Balesteros, Marie Angelie Pascual ug Marie Vergie Santader kabahin sa pagbalhin sa kwarta gikan sa buhatan sa Sinulog Foundation Office ngadto na sa Administrative Office ug wala gani mabutang kung dunay partisipasyon si Jabagat dihang ilaha kining gihimo.

Samtang sa alegasyon ni Allan Ramil nga nakit-an niyang paspas nga miuli si Jabagat dala ang itom nga backpack wala magpasabot nga kwarta ang sulod niini.

Dugang pa ni Truya nga wala magpasabot nga kung nangita sa yawe sa Admin Office si Jabagat nakasulod na siya niini sanglit ang gipangayoan niya niini nga si Rosita Velasco wala mohatag sa maong yawe.

“This means that someone not the respondent (Jabagat) had access to the office at the time of the loss,” tipik sa desisyon.

Gimando hinuon ni Truya ngadto sa mga imbestigador nga ipadayon ang ilang imbestigasyon pagpangita sa responsable sa krimen.  (BANATNEWS)