CEBU, Philippines - Sugdan na sa sunod buwan ang trabaho sa pag-usab sa Larsian sa Fuente ning siyudad sa Sugbo ngadto sa usa ka Eco-Larsian.
Kini human imando ni Governor Gwendolyn Garcia nga pasugdan na ang trabaho sa kapin P7 milyones nga proyekto sa tuyo nga ang Larsian labi pang makapadani sa mga dumuduong sa Sugbo.
Ang maong kamandoan gipadangat sa gobernador ngadto sa Provincial Engineering Office atol sa tigum nga iyang gipatawag nga gitambungan usab ni Cebu City Administrator Jose Marie Poblete, mga opisyal sa asosasyon sa Larsian ug Noel Rodriguez ang hepe sa Squatters Prevention Elimination and Encroachment Division (SPEED).
Gusto sa gobernador nga kinahanglang kasugdan dayon ang trabaho sa maong proyekto aron mapalambo ang maong dapit.
Ang presidente sa Larsian Stall Holder Association nga si Mac Azarcon miingon nga ilang gihangop ug gipaluyohan ang lakang sa gobernador sanglit sila man ang mabulahan sa maong proyketo.
Kini bisan pa man og mabalhin sila sa laing lugar samtang gi-develop ang maong dapit.
Samtang si Rodriguez mitug-an nga ilang susihon ang lugar nga balhinan sa mga stall holder sa Larsian aron usab malikayan ang traffic.
Sumala sa giplano, may 49 ka mga bar-b-que stall ang ibutang sa bag-ong Eco-Larsian. 20 ka fruit stand, 3 ka souvenir shop, mga comfort room ug water treatment facility.(/WC) (BANATNEWS)