Nagdala og armas nga ihas sikop

CEBU, Philippines - Natanggong sa Talisay City detention cell ang usa ka 28-anyos nga lalaki human kini masakping naghupot og armas nga wala’y lisensiya sa barangay San Roque sa maong dakbayan kagahapon sa kadlawon.

Ang suspetsado mao si James Bond Abarque, 28, ug residente sa maong dapit.

Ang misikop ni Abarque mao si Kagawad Crisanto Labajo ug ang mga tanod nga sila si Fermin Galas, Henry Patatag, Bartolome Teo, Mario Gino ug Lyndon Deiparine.

Naimbargo sa maong mga opisyal sa barangay gikan kang Abarque ang usa ka kalibre .38 nga revolver nga adunay tulo ka buhing bala ug laing duha ka bala sa super .38 caliber pistol.

Sayo niini nagkaguliyang ang mga molupyo sa maong lugar dihang nakita nila ang suspek nga nagtangkil og armas de fuego.

Sa ilang kabalaka nga mamusil kini mitawag sila sa barangay hall   aron nga kini masikop.

Hinuon wala mopakita og pagsukol ang suspek dihang gisikop siya sa mga otoridad sa barangay.

Gipaabot nga pasakaan siya og tukmang kaso ngadto sa korte karong adlawa.  - BANAT NEWS