Giluba sa diskohan patay

CEBU, Philippines - Patay ang usa ka 27-anyos nga lalaki human kini dunggaba kagahapon sa kaadlawon diha duol sa plaza sa sitio Purok 5, barangay Bagakay, dakbayan sa Toledo.

Ang biktima mao si Benedicto Radana, residente sa maong dapit nakaangkon og usa ka samad dinunggaban sa iyang tiyan nga maoy hinungdan sa iyang kamatayon.

Ang suspetsado mao si Elmer Sabroso, 40-anyos, residente sa sitio Purok 2 sa maong barangay ang daling miikyas human sa hitabo.

Sila si PO3 Edmund Liston ug PO3 Jun Ian Alqueza sa Don Andres Soriano (DAS) Police Community Prencint-1 (PCPO) ang daling miresponde sa maong insidente.

Si SPO4 Gil Lastimosa, duty desk officer sa Toledo Police Station nga nahinabi sa Banat News nagkanayon adunay gipahigayong disko diha sa plaza sa barangay dihang nahitabo ang pagpanunggab.

Si Radana daling gidala sa usa sa mga tambalanan sa dakbayan sa Sugbo apan nakabsan kini sa iyang kinabuhi samtang nagbiyahe pa, wala pa matino sa kapolisan ang motibo sa krimen.  - BANAT NEWS