Ginikanan hayan maoy kasohan - Polis

CEBU, Philippines - Gitun-an sa kapolisan ang posibilidad nga mapasakaan og kaso ang mga ginikanan sa 14-anyos nga batang lalaki kinsa mipusil patay sa iyang 16-anyos nga maguwang diha sa lungsod sa Tabogon.

Sumala pang Senior Inspector Alex Ancao, hepe sa Tabogon Police Station ilang gisusi kung mapasakaan og kasong sibil ang mga ginikanan sa duha tungod kay sila maoy adunay responsibilidad sa ilang mga anak.

“Within the family ang incident but we are still coordinating with the DSWD (Department of Social Welfare and Development) kung what appropriate case ang i-file,” ni Ancao pa nga nahinabi sa The Freeman igsuong pamantalaan sa Banat News.

Gibutyag ni Ancao nga ang suspetsado giingong nalambigit usab sa pagpangawat ug duna pay ubang mga reklamo silang nadawat batok niini ug dili palang dugay nakit-an kining dunay giatangang drayber sa habalhabal nga buot niyang panimaslan ug nagdala kini og pusil.

Gibutyag usab ni Ancao nga niadtong Biyernes ang maong menor gireklamong namato og tindahan sa ukay-ukay diha sa ilang barangay apan sa ilang pagresponde nakaipsot na kini.

“Ako di nako mahibulong aning bataa kay murag naa gyud siya’y criminal instinct pero unsaon nga di man mapriso,” ni Ancao pa. Ang suspetsadong menor giingong nasuko sa iyang maguwang dihang nahimo siyang kataw-anan tungod kay nailad siya niini sa text dihang nagpakaaron-ingnong babaye ang maguwang hangtud nga sila nagkauyab.

Apan dihang iyang nadiskubrehang ang iyaha rang maguwang ang iyang nauyab gipusil niya kini sa ulo gamit ang .38 kalibre nga rebolber samtang nagkaon og paniudto ang biktima sa ilang payag.

Sa imbestigasyon sa kapolisan giingong ang pusil nga gigamit sa suspetsado iyaha kini sa biktima ug napalit ngadto sa dakbayan sa Danao ug dili iya sa maguwang nga maoy unang pamahayag niini.

Giingong ang maong pusil gituyo sa biktima aron pagpanalipod sa iyang kaugalingon ug gamiton nga panghadlok niini ngadto sa ilang amahan kung mahubog kini.

Sa laing bahin, si Bise Gobernador Agnes Magpale, chairman sa Committee of the Women and Children’s Welfare nagkanayon kini nga andam silang motabang sa suspetsado pinaagi sa paghatag kaniya og psychosocial intervention.

“Again it all boils down to the values today sa mga bata nga init na og mga ulo and again it’s parents responsibility,” dugang ni Magpale. - Brenda D. Batuto ug Ria Mae Y. Booc sa The Freeman/EIM (BANAT NEWS)