Driver misukolsa tulisan giluba angol

CEBU, Philippines - Nalandig sa tambalanan ang usa ka drayber sa taxi human kini lubaa sa tawo nga motulis unta kaniya didto sa sitio Kalmar, barangay Lawaan I, dakbayan sa Talisay kagahapon sa kaadlawon.

Ang biktima mao si Angel Gapate, 46, taga dalan M.J. Cuenco Avenue, dakbayan sa Sugbo ug drayber sa Sheena Taxi nga nagtangag sa plakang GXD-920.Si Gapate kinsa nakaangkon og mga samad dinunggaban sa iyang lawas daling gidala sa mga estambay ngadto sa Talisay City District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo

Si PO1 Gerald Rollon sa pakighinabi niini sa Banat News kagahapon nagkanayon nga base sa imbestigasyon nila ni PO2 Roy Lofranco, PO2 Oliver Ortega, PO2 Aquiles Cabando ug PO1 Euwen Pitogo nga sa sayo niini ang maong tulisan nagpakaaron-ingnon nga pasahero kinsa misakay sa taxi ni Gapate didto sa barangay Mabolo, dakbayan sa Sugbo ug nagpahatod ngadto sa dakbayan sa Talisay.

Apan pag-abot sa lugar nga nahitaboan ang maong tulisan kalit lang mition sa iyang kutsilyo ngadto sa biktima uban sa pagdeklarar nga tulis.Gumikan kay may pangamot ug nakapraktis usab og self defense, misuway sa pagsukol ang biktima   sa tulisan   hinungdan nga gihansakan siya sa makadaghan sa dalang kutsilyo niini ug dihang nakita nga mibuhagay na ang dugo sa kalawasan sa biktima dali kining nanaog sa taxi gibiyaan ang biktima   ug misibat nga walay dalang kuwarta.

Matud ni Rollon nga base sa imbestigasyon usab sa iyang mga kauban nasayran nga si Gapate nakahigayon pa sa paggawas sa iyang sakyanan ug nakapangayo og tabang sa mga estambay sa maong lugar.Ang kapolisan   padayon pa sa ilang follow-up operation sa maong insidente. (BANATNEWS)