Oil spill sa Bien Unido gipasusi

TAGBILARAN CITY, Philippines  – Gimando sa Kapitolyo sa Bohol ang pagsusi sa giingong oil spill gikan sa usa ka barkong miagi sa ilang kadagatan aron pagsigurong mahimoan dayon kini og lakang aron di makadaot sa kadagatan.

Ang buhatan ni Gov. Edgar Chatto pinaagi ni provincial administrator Alfonso Damalerio III, mimando sa Bohol Environment Management Office (BEMO) sa paghimo og imbestigasyon.

“To conduct an investigation and inquiry on the matter in coordination with concerned municipal officials,” sumala pa sa kamandoan human makadawat og suwat gikan kang Bien Unido Mayor Nino Rey Boniel kabahin sa maong oil spill nga nasigpatan sa kapolisan. Matud pa nga si Boniel nangayo og tabang sa Kapitolyo tungod sa giingong oil spill. 

Ang BEMO mipadala na og grupong moimbestigar ug mosusi sa maong report nga gipangulohan ni Leonilo Lafuente diha sa isla sa Bilangbilangan Daku sa Tagbilaran City.

Sumala pa sa report sa hepe sa kapolisan sa maong dakbayan nga si Chief Insp. Felicito Injog Garcia ngadto sa mayor nahitabo ang oil spill niadtong Enero 6, 2012 alas-7 sa gabii nga nakapahadlok sa mga residente sa maong isla.

Base sa pasiuna nilang pagsusi ang kapolisan mibutyag nga ang barkong M/V Elizabeth, nga may pintal nga puti, puwa ug asul gialegar nga maoy miyabo sa maong mga lana.

“Did then and there deliberately dumped/splashes their waste used oil into the sea,” sumala pa sa report sa kapolisan.

 “That when the oil spill was scattered on the sea water it is most probably that it was carried and swept away by the waves and current towards the northern part of the island of Bilangbilangan Dako of this municipality,” matud pa ni Garcia.

Dihang mitaob ug napadpad sa baybayon sa maong isla ang oil spill namilit kini sa mga basura ug mga gapnod.

Hinuon gikunsiderar ni Garcia nga “quite manageable” ra ang maong oil spill ug walay peligro sa marine life ug sa mga residente apan gikinahanglang ipadayon ang imbestigasyon aron manubag ang mga sad-an. (BANATNEWS)