Kapitan sa barko milutaw sa dagat patay

CEBU, Philippines - Patay nang nakit-an ang usa ka kapitan sa barko nga giingong wala na mo-report sa iyang barko sukad pa niadtong Enero 18 dihang kini napalgang naglutaw-lutaw sa pantalan ning dakbayan niadtong Huwebes sa hapon.

Sumala pa sa report, base sa identification card sa maong kapitan giila kining si Capt. Leoncio Lamban nga kapitan sa barko nga gipanag-iya sa Jehan Shipping Corporation.

Si Lamban nga taga Davao del Sur giingong nananghid nga molakaw niadtong Enero 18 apan wala na kabalik ug nahibaw-an nalang nga nasigpatan kining naglangoylangoy sa maong kadagatan niadtong milabay’ng adlaw.

Apan patay na kini dihang nakit-an pagbalik. Gikatakdang ipaawtopsiya ang patay’ng lawas niini nga gibutang sa usa ka punerarya ning dakbayan. (BANATNEWS)