Gi-salvage 'badlungon' sa ilang barangay

CEBU, Philippines - Nailhan na kagahapon sa buntag ang lalaking napalgang patay ug gituohang gi-salvage niadtong Huwebes sa buntag sa barangay Manipis, dakbayan sa Talisay.

Si SPO4 Daniel Tarucan nga nahinabi sa Banat News kagahapon mibutyag nga ang nahisgutang biktima nagpanuigon kini og 17-anyos o usa ka menor de edad, residente sa barangay Bulacao, dakbayan sa Sugbo.

Matud ni Tarucan nga ang maong biktima gipasanginlang suspetsado sa tulis sa usa ka lending diha sa sitio Mahayahay, barangay Candulawan, dakbayan sa Talisay ug gipasanginlan usab kining nakapusil ug nakapatay sa mao gihapong barangay pipila ka bulan na ang nakalabay. Apan wala nila kini madakpi ug mapasakai og kaso kay walay mibarog nga testigo. Ang uyoan sa biktima usa ka kagawad sa barangay Candulawan, Talisay ug ang iyang amahan usa ka tanod sa barangay Bulacao, dakbayan sa Sugbo.

Matud usab ni Tarucan nga niadtong Miyerkules sa buntag dunay mga batan-ong mga babaye ug mga lalaki ang mianha sa balay sa biktima ug giimbitar kini nga motambong og birthday party apan niadtong higayona wala diha sa ilang balay ang biktima.

Nianang pagkagabii sa nahisgutang adlaw giingong ang nangimbitar sa biktima mibalik ug gidala kini apan niadtong Huwebes sa sayo sa buntag napalgan na lang kining patay diha ubos sa railings sa daplin sa karsada sa barangay Manipis.

Gituohan sa kapolisan nga atraso o ba kaha dunay giawayan sa iyang kauban sa motorsiklo ang biktima maong kini gipusil.

Samtang si PO1 Gerard Rollon mibutyag sa mga tigbalita kagahapon nga nakadawat siya og tawag sa usa ka nagpailang concerned citizen nga nagdumili og butyag sa iyang ngalan ug misulting ang biktima dunay atraso ug badlongon sa ilang lugar. (BANATNEWS)