Dul-an P1M shabu nasakmit apan pusher nakaipsot

CEBU, Philippines - Gibana-banang mokabat dul-an usa ka milyon nga kantidad sa mga shabu ang nakuha sa kapolisan sa Regional Anti-Illegal Drugs Special Operation Task Force sa miaging gabii sa barangay Villagonzalo 11 ning dakbayan.

Ang maong grupo mipahigayon og raid batok kang Melchor Cuambot dela Cruz alyas Echoy, 45, apan nakaipsot kini ug bugtong ang gipasanginlang mga runners niini nga silang Allan Tamonan Ygot, 43, molupyo sa barangay Luz, Joel Soliano Dela Cruz, 24, Charlie Alcibar Garciso, 26, ug igsuon niining si Evangeline dela Cruz Aquino, 40, maoy nadakpan.

Sa pakighinabi sa Banat News ni Sr. Insp. Henrix Bancoleta, ang team leader sa maong operasyon mibutyag nga niadto pang unang semana sa buwan sa Disyembre nila gipaubos sa surveillance si dela Cruz.

Apan nianang gabhiuna lang sila nakakita og higayon ug gihimo dayon ang buybust operation diin ilang gipalitan si dela Cruz og usa ka medium pack nga shabu nga nagkantidad P25 mil.

Sumala pa nga si dela Cruz maoy mitunol sa pakete ngadto sa poseur buyer nga polis apan nakabantay dayon kini ug midagan sa sudlonong bahin sa lugar.

Matod pa ni Bancoleta nga sa diha nga ilang gisulod ang panimalay ni dela Cruz ilang naabtan ang mga kaubanan ni dela Cruz ug ang igsuon niining babaye nga nag-repack pa sa maong ilegal nga drugas.

Nakuha sa panimalay ni dela Cruz mao ang usa ka medium pack nga gituohang shabu, duha ka orange round plastic nga shabu nga gibana-banang mokantidad og dul-an usa ka milyon.

Lakip usab sa nakuha ang mga gamit sa pagpamaligya ug pagsuyop sa shabu ug ingon man kwarta nga nagkantidad og kapin usa ka libo.

“ It’s more like a family business pero among nasayran mao nga kana pa silang duha (Melchor ug Evangeline), ug ang asawa ni Melchor,” matud pa ni Bancoleta.

Samtang si Melchor dela Cruz, base sa ilang nakuha nga impormasyon giingong makabaligya og usa ka kilong shabu matag bulan nga mobalor og P7 milyon sa street value. (BANATNEWS)