Mipatay sa silingan nadakpan

CEBU, Philippines -  Nadakpan sa kapolisan ang usa ka tawo nga gipasanginlang nakapusil patay sa iyang silingan niadtong miaging hapon sa barangay Tayud, lungsod sa Liloan.

Ang nadakpan mao si Adonis Cuyos, 47, kinsa maoy suspetsado sa pagpusil patay kang Maximino Serape, 80, pulos nagpuyo sa maong dapit.

Si SPO2 Ernesto Pepito sa kapolisan sa nahisgotang lungsod nga nahinabi sa Banat News miingon nga adunay daan nga panagbangi ang biktima ug suspetsado sa nakalabay pang tuig.

Dugang pa niya nga nagsugod ang maong panagbangi dihang gipasanginlan sa suspetsado nga gidala sa biktima ang tari sa manok niini nga gikasuko sa naulahi ug gipabuthan og armas ang suspek.

Tungod sa pagpabuto og armas sa biktima giaresto kini sa kapolisan apan nakapiyansa human pasakai og kaso apan giingong gipanimaslan kini sa suspek.

Ang biktima gisuwayan pagdala sa tambalanan apan namatay kini, hinuon sa gihimong followup operations nadakpan ang suspek sa kapolisan. (BANATNEWS)