Tinun-an gituok, gidunggab sa liog

CEBU, Philippines - Swerteng naluwas gikan sa peligro ang 20 anyos nga tinun-an sa kolehiyo human kini gituok ug pagkahuman gidunggab sa usa ka security guard sulod sa diskohan atol sa kapistahan sa barangay Pulangbato siyudad sa Bogo niadtong Miyerkules sa alas 2:00 sa kaadlawon.

Ang biktima mao si Nelson Villegas Jr, 20, nagpuyo sa maong lugar nakaangkon og samad dinunggaban sa liog tungod sa kasuko sa suspek nga si Medil Ursal, 19.

Matud ni PO3 Allan Dosdos, imbestigador sa Bogo City Police dihang nahinabi sa Banat News nagkuyog ang biktima ug mga barkada samtang sa pikas pundok mao ang grupo sa suspek nga nag-disco. Ang duha ka pundok matud pang Dosdos nagpanindotay og sayaw apan tungod kay maayong mokiay ug mosayaw ang biktima nasuya ang suspek ug kalit giduol ang biktima ug gituok.

Tungod niini miulbo ang lamoklamok ug dihadiha kalit gihansakan sa suspek og kutsilyo ang liog sa biktima dayon midagan kini palayo ug wala na madakpi sa kapolisan.

Ang biktima nga samaron sa liog daling gihatud sa mga barkada ug sa mirespondeng mga polis sa tambalanan ug luwas na ang kahimtang. (BANATNEWS)